Video: Babba og mammubeiggi fingu meg at hugsa um okkurt annað

Katowice, Pólland (Portalurin): - Jógvan (mammubeiggi, red.) dámar væl at "futta nakrar jokes" av, so tað var fínt.

Óli Mittún er fegin um, at pápin og pápabeiggin vóru við í bilinum á veg til sjúkrahúsið í gjárkvøldið. Teir fingu HM-toppskjúttan at hugsa um okkurt annað enn tunga tapið í HM-hálvfinaluni.

Ein syrgin Óli Mittún við "Dagins spælara" heiðrinum (Mynd: Sverri Egholm)

Jógvan Ellefsen er mammubeiggi Óla Mittún og hevur verið í Póllandi og stuðlað seinastu dagarnar saman við pápa HM-toppskjúttan, Peturi Mittún (Mynd: Sverri Egholm)

Sí eisini: Dramaði og vónbrotið í Póllandi (Myndir)

Sí eisini: Óli fekk sár - koyrdur á skaðastovuna at seymast

Á skaðastovuni varð Óli seymaður omanfyri vinstra eyga. Talan er um fýra pentur, greiðir Óli Mittún Portalinum frá í dag.

- Eg havi eitt sindur ilt, men trúgva ikki at tað er heilaskjálvti ella nakað meira enn sjálvt sárið. 

Harvið kann Óli eftir øllum at døma spæla bronsudystin móti Svøríki í morgin - við einari ella aðrari verju við eygað. 

Sí eisini myndir og annað her: Óli Mittún: - Spæli móti Svøríki í morgin um alt gongst væl í dag

Mynd: Sverri Egholm

Óli hevur spælt í júst svenskum hondbólti trý tey seinastu árini, og harvið kennir nú fyrrverandi Sävehof-spælarin svenska liðið ógvuliga væl. Hann skoraði eisini 17 mál í sigrinum móti Svøríki í U19 HM í 2023.

Sí eisini samrøðu við Óla frá tá: - Hetta er næstan óbeskriviligt 

Í samrøðuni við Portalin í seinnapartssólini, staðfestir føroyski spælskiparin, at teir í U21-hópinum eru ógvuliga takksamir fyri stuðulin frá føroyingum.

- Tað er fantastiskt. Sjálvt um tað er "bara U21". Vit hava fingið nógv fitt boð - serliga síðani í gjárkvøldið. Tað eru vit ógvuliga takksamir fyri, og vit vilja gjarna geva føroyingum eina bronsu í morgin afturfyri, sigur Óli Mittún at enda.

Hoyr alla samrøðuna ovast

Sí eisini: Ísak: - Hetta var pent sagt forferdeligt - men glaður fyri at tað var eg