- Vit áttu at veri frammanfyri í hálvleikinum

- Vit vóru nøgdir við okkara fyrra hálvleik. Vit áttu at veri á odda við tveimum ella trimum málum í hálvleikinum, og tað er tað, sum iðrar meg mest í kvøld.

Soleiðis segði venjarin hjá føroyska landsliðnum, Peter Bredsdorff Larsen, á tíðindafundinum eftir dystin í kvøld, sum slovenar vunnu 32-29.

Um slovensku mótstøðuna segði hann.

- Í øðrum hálvleiki sóðu vit hvat slovensku leikararnir megna. Vit sóu nakrir sera góðar leikarar, sum vit hava stóra respekt fyri. Slovenia hevur eitt gott lið, og eg fari at ynskja teimum alt tað besta víðari í kappingini.

Sum um alt Føroya fólk var í høllini

Og so var tað stuðulin frá áskoðarunum:

- Eg má siga, at vit eru glaðir fyri stuðulin, vit fingu. Tað virkaði sum um alt Føroya fólk var til staðar í høllini í dag. Tað var fantastiskt. Og føroyingarnir hava imponerað í Berlin, og koma eisini at gera tað teir komandi dagarnar.

- Okkara vón er, at vit kunnu gera eitt enn betri avrik móti Noregi í leygarkvøldið.

Uros Zorman, slovenskur landsliðsvenjari (Mynd: Jóanis Albert Nielsen / jn.fo)

- Takk fyri ein góðan dyst

Slovenski venjarin Uros Zorman hevði rósandi orð til føroyska liðið í sínum uppleggi á tíðindafundinum.

- Eg fari at takka føroyska liðinum fyri ein góðan og fair dyst. Føroyska liðið vísti gott spæl við góðum og kvikum leikarum, sum áttu góðar fintur, sum vit líka skuldu venja okkum við.

Zorman vísti á, at lið hansara er merkt av skaðum, og at tað kanska ikki hevur gjørt føroysku fyrireikingarnar so lættar, tí tað eru fleiri av føstu leikarunum, sum ikki eru við.

Men hann ásannaði, at menn hansara hava tær størstu royndirnar í slíkum dystum, og at tað helst eisini var avgerandi fyri úrslitið í kvøld.