13 ferðir Óli Mittún

Fyrsta kappingarárið hjá Óla Mittún í svenskum hondbólti (2022-2023) endaði við tungum tapi í Kristianstad í fimtu og avgerandi finaluni um svenska meistaraheitið.

Síðsta kappingarár tók IK Sävehof gullið aftur, tá júst Óli Mittún hevði høvuðsleiklut. Tað átti hann so sanniliga eisini í gjárkvøldið, tá Kristianstad vitjaði í Partille.

Útiliðið var á odda 17-16 í steðginum, men í 2. hálvleiki fekk verjuparturin hjá heimaliðnum betri tak á, samstundis sum álopsmaskinan hjá svensku meistarunum koyrdi víðari. Har var ungi føroyski bakspælarin í miðdeplinum.

- Í álopinum snúði tað allarmesta seg um Óla Mittún, sum sameinti megi við snildni (finessu). Trettan mál og fýra upplegg í almennu hagtølunum merkir, at okkara spælskipari úr Føroyum var beinleiðis íblandaður í yvir helminginum av málunum hjá liðnum hetta desemberkvøldið, tá Sävehof at enda vann 33-29 á Kristanstad.

Soleiðis skrivar almenna heimasíðan hjá Sävehof um avrikið hjá unga hoyvíkinginum og liðnum.

Føroyski strikuspælarin Ísak Vedelsbøl skoraði eitt mál í sigrinum á Kristianstad, sum eisini hevur 15 stig.

Sigurin kemur á eitt "turt stað" hjá IK Sävehof, sum hevur spælt nógvar dystir í seinastuni og eisini tapt fleiri. Nú er Sävehof úti av European League og steypakappingini, so tað er bert heimliga kappingin at hugsa um. Við sigrinum í gjárkvøldið lyfti Sävehof seg upp 15 stig á 3. plássi - heili fimm lið hava 15 stig.