Daniel Johansen legði upp til bæði málini í sigri

Hillrød var júst ov stutt til ovara endaspælið í næstbestu donsku deildini, men føroyingafelagið er nú langt fremst í niðara endaspælinum. 

Eftir sigurin á Hobro í kvøld er Hillrerød níggju stig frammanfyri júst Hobro og B93. 

Daniel Johansen átti stóran leiklut í sigrinum. 26-ára gamli føroyski vinstri bakkurin spældi fullan dyst í Farum, var við til at halda málið reint og legði eisini upp til bæði málini í 2-0 sigrinum.

Fyrrverandi HB-spælarin hevur fleiri ferðir áður víst sítt vinstra bein og spælskil væl fram, og hetta kom væl við hjá málskjúttunum Monday Etim og Tobias Arndal í kvøld.

Daniel er í gongd við sítt fyrsta kappingarár í Hillerød, og hann hevur spælt í hvørjum dysti í 2025. Vinstri bakkurin hevur ikki verið við í landsliðshópinum seinastu tvær ferðirnar.

Tað hevur Adrian Rúnason Justinussen, sum spældi 81 minuttir í kvøld. Føroyingurin var flúgvandi í byrjanini av kappingarárinum, men hann hevur ikki skorað ella lagt upp í kappingardysti fyri Hillerd í 2025. Adrian legði tó upp til føroyska málið í Kekkia fyri 13 døgum síðani.