Enn ein dystur í Premier League raktur av korona

Dysturin millum Tottenham og Fulham í Premier League í kvøld er útsettur orsaka av korona.

Orsøkin er, at fleiri av leikarunum í hópinum hjá Fulham hava víst seg vera positivir í eini koronakanning. Fleiri hava eisini víst sjúkutekin, skrivar Premier League á Twitter.

Enn er óvist nær dysturin kann spælast, men tað kann vísa seg at gerast ein trupulleiki, um ikki Tottenham rýkur út í einum av steypakappingunum, EFL Cup, FA Cup ella Europa League.

Tí nú eru ongir dagar eftir í kalendaranum, har hesin dystur kann vera spældur.

Fyrradagin varð dysturin millum Everton og Manchester City eisini útsettur, tá fleiri smittaðir vórðu staðfestir í hópinum hjá City.