Favorittarnir skulu til Klaksvíkar í kvøld

Fyrsta FM-hálvfinalan varð spæld í Høllini á Hálsi í gjárkvøldið. Neistin var omaná so at siga allan dystin, men H71 hekk við fram til umleið tíggju minuttir vóru eftir. Hoyvíkingar javnaðu, tá 14 minuttir vóru eftir, men so runnu teir í bláum avstað og skoraði átta av teimum næstu tíggju málunum. 

Sí eisini: 
Finalupláss hómast hjá Neistanum
Myndir: Neistin - H71 hálvfinala

Samrøður:
Tróndur Kragesteen: Vóru eina tonn skarpari - Sasha var heilt stóri munurin
Pauli Jacobsen: - Tapa ov nógvar nærdystir

Tað er fyrst upp í tveir sigrar í hálvfinalunum, og harvið kann Neistin tryggjað sær finalupláss við sigri í Hoyvík leygardagin.

Í hinari hálvfinaluni eru VÍF og Team Klaksvík. Samanlagt eru vestmenningar stórfavorittar. Teir hava verið á odda í grundspælinum so at siga allan vegin, vunnu tað við sjey stigum niður til H71 og hava ein sterkan hóp við fjølbroyttum dygdum - teir vunnu eisini í Klaksvík fyri stuttum.

VÍF hevur verið omaná í flestu dystunum 

VÍF stóð seg gamaní ikki væl í steypakappingini og tapti fyri júst Team Klaksvík á heimavølli fyrst í mars. Tá var Mladen Mjerimacka ikki við. Royndi og dugnaligi málverjin hevur verið skaðadarvaður, men hann kann helst fáa ein leiklut í hálvfinalunum. 

Team Klaksvík misti Nikola Kedzo í vetur - hann gjørdist skaddur - men liðið hevur víst seg væl fram í fleiri dystum seinastu vikurnar: Serliga í omanfyri nevnda sigrinum í Vestmanna og í fjórðingsfinaluni í Kollafirði leygardagin. 

Tá var Jens Pauli Poulsen (f. Mohr) ein sum veruliga vísti vegin - bæði í verju og álopi - og hann skoraði avgerandi málið. 28-ára klaksvíkingurin hevur aftur í ár ment seg. David Henigman verður eisini ógvuliga týðandi. Kroatiski málverjin byrjaði fjórðingsfinaluna framúr væl og hevur eisini nógvar stórar bjargingar síðstu løtuna í Kollafirði. Hann skal standa væl ígjøgnum dystin í kvøld, fyri at Team Klaksvík skal hava ein møguleika mótu favoruttunum í gulum og bláum.

Fyrsta bríksl í Badmintonhøllini í Klaksvík verður klokkan 18.30. Nógv bendir á, at heilt nógv fólk vera til hálvfinaluna, tí eitt slag av hondbóltfepuri er í Klaksvík, og tað er sjálvdan at mansliðið í býnum spælir slíkar dystir. Portalurin verður á staðnum og hevur ymisk tilfar frá dystinum.

FM Hálvfinalur 1
Í dag, hósdagin 13. apríl
18.30 Team Klaksvík – VÍF

Í gjár, mikudagin 12. apríl
Neistin – H71 28-21

Toppskjúttar: Tróndur Kragesteen 9 mál, Ísak Vedelsbøl 7 mál - Bogi Hansen 8 mál

Sí dómaraseðil her


Seinna hálvfinalurnar 
Leygardagin 15. apríl
18.00: H71 - Neistin


Sunnudagin 16. apríl
19.00: VÍF - Team Klaksvík