Flokkarnir tykjast sinnaðir at hjálpa ítróttini

Leiðslurnar í politisku flokkunum – forkvinnan í Framsókn og formenninir í hinum flokkunum – vóru í dag á fundi við ÍSF, har partarnir viðgjørdu trongu fíggjarstøðuna hjá føroyskari ítrótt. Tað var á aðalfundinum hjá ÍSF 30. mai í ár, at ÍSF-forsetin gjørdi greitt, at stuðulin til sambondini minkar 11 prosent, um játtanina til ítróttina ikki økist minst 1,5 milliónir krónur í 2021.

- Tað er okkara fatan, at floksleiðslurnar skilja trongstøðuna hjá ítróttini. Tað er eisini okkara vón, at flokkarnir hugsa um, hvussu teir í einari breiðari semju kunnu spenna eitt fíggjarligt trygdarnet undir føroyskan ítrótt, tí sum samfelag hava vit ikki ráð at niðurlaga ítróttin, sigur Elin Heðinsdóttir Joensen, ÍSF-forseti.

Korona-kreppan hevur harumframt havt við sær, at færri hava spælt við í Danske Spil seinasta hálva árið, og tí minkar stuðulin til føroyska ítrótt frá Sp/f Ítróttavedding, helst uppaftur meira.

- Støðan er so mikið álvarsom, at ítøkilig stig skulu takast skjótast gjørligt, um ítróttin ikki skal verða fyri einum álvarsligum bakkasti, har tað verður trupult hjá føroyska ítróttaheiminum at fóta sær aftur. Men, sum sagt, so eru vit vónrík eftir fundin við politisku flokkarnar í dag, staðfestir Elin Heðinsdóttir Joensen, ÍSF-forseti.

Tíðindaskriv frá Ítróttasambandi Føroya