FM fyri fyrstu ferð: - Orð kunnu ikki lýsa hetta

Hon hevur vunnið gull í ungdómsdeildini, har strandakvinnan millum annað hevur avgjørt steypafinalu fyri Skála á framúrskarandi hátt, og nú hevur hon vunnið FM-gull í fremstu deildini.

- Hetta er heilt fantastiskt...orð kunnu ikki lýsa hetta, sigur Sólja Ernsdóttir á vøllinum í Djúpumýru tíðliga í kvøld, eftir at FM endaliga er komið í hús hjá KÍ.

Nú 19-ára gamli áleyparin hevur júst fullført sítt annað kappingarár við KÍ, og eftir at tað ikki gekk hjá sigursvanda felagnum í fjør og heldur ikki í steypakappingini, so smakkar hetta gullið eyka søtt.

- Vit hava verið ógvuliga svangar eftir at fáa tað heim. Hetta hava vit arbeitt gróthart fyri og veruliga vilja tað - so haldi at hetta var uppiborið.

Sí fleiri myndir frá FM-fagnaði í Klaksvík her

Sólja hevur sjálv átt stóran lut í FM-heiti nummar 24 hjá teimum í kongabláum. Hon hevur skorað 21 landskappingarmál - bert liðfelagin Tóra Mohr og Heidi Sevdal hjá NSÍ hava skorað fleiri -  millum annað átti skjóti spælarin avgerandi mál og upplegg í oddadystinum í Runavík í august.

Dygdirnar eru til meira enn føroysku kappingina, men sum tað sær út nú, verður Sólja Ernstdóttir eisini KÍ-spælari í 2026. Hetta staðfestir hon fyri Portalinum.

Sí alla samrøðuna ovast

Sí eisini: Óluva: - Eitt forloysandi FM-heiti hjá okkum