Føroyar vunnu dystin um 2. plássið

Føroyar eru í ár í bólki við einum landi, sum á pappírinum er nakað betri, og Slovakia vann eisini 3-0 á Føroyum í fyrsta umfar í februar. So eru tvey lið, sum føroysku kvinnurnar hava ein heilt góðan møguleika at basa - helst á heimavølli.

Fyri beint yvir fimm vikum síðani, tá so at siga eingin føroyskur spælari var í dystarvenjing, eydnaðist at vinna 1-0 á Gibraltar í einum órútmiskum dysti.

Í gjár var føroyska spælið samanlagt betri samansett og tað var fult uppiborið, at Føroyar vunnu 2-0 á Tórsvølli.

Eins og á Gibraltar, skoraði Heidi Sevdal. Hetta var eftir flott forarbeiði frá innskiftu Eyðvør Klakstein. Áðrenn málið hjá føroyska metmálskjúttanum í 75. minutti, hevði Durita Hummeland lagt Føroyar á odda við sínum fyrsta A-landsliðsmáli. Hetta var í fyrsta álopinum eftir steðgin, tá KÍ-liðfelagin Tórunn Højgaard Joensen legði eitt gott frísparksinnlegg.

Omanfyri: Heidi Sevdal hevur økt fyri Føroyar við sínum landsliðsmáli nummar 30 Niðanfyri: Heidi og Eyðvør Klakstein, ið legði upp, fegnast eftir seinasta bríksl (Myndir: Sverri Egholm)

Durita Hummeland var stinn í miðverjuni og hevði ein serstakan dyst (Mynd: Sverri Egholm)

Sí fleiri myndir frá dystinum HER

Føroyar vóru omaná, og tað vísa hagtølini eisini. Sigurin merkir, at Føroyar nú eru nummar tvey í Nations League-bólkinum við seks stigum. Moldova hevur 3 stig fyri tríggjar dystir.

Slovakia er oddalið við fullum stigatali. Í gjár vunnu tær slovakisku heili 8-0 á Gibraltar. Júst Gibraltar vitja Føroyar týskvøldið, tá tað kann eydnast at so at koma heilt nær at  tryggja í minsta lagi 2. plássið í bólkinum.

Nations League deild C bólkur 1, 3. umfar
Í gjár, fríggjadagin 4. apríl, Tórsvøllur 
Føroyar - Andorra 2-0 (0-0):
47' Durita Hummeland (Tórunn Højgaard Joensen) 1-0
75' Heidi Sevdal (Eyðvør Klakstein) 2-0

Føroyar: Óluva Allansdóttir Joensen - Julia Naomi Mortensen, Birita Ryan, Durita Hummeland, Tórunn Højgaard Joensen - Fridrikka Maria Klementsen, Sanna Svarvadal, Sara Samson Lamhauge, Jensa Tórolvsdóttir, Ásla Johannesen - Hedi Sevdal

Hesar komu inn í 2. hálvleiki: Eyðvør Klakstein (60'), Anna Brændstrup og Petra Hoydal (79'), Jancy Mohr og Rúna Jacobsen (87')

Fyribils høvuðsvenjari: Pætur Smith Clementsen

Eftir trý umfør:
1. Slovakia 9 stig
2. Føroyar 6 stig
3. Moldova 3 stig
4. Gibraltar 0 stig

4. umfar - týsdagin klokkan 17 á Tórsvølli: 
Føroyar - Gibraltar