Tíðindaskriv
Í samstarvi við Føroya Tele, fer Fótbóltssamband Føroya í næstum undir at skipa fyri e-fótbóltskappingum. Endamálið við kappingini er at finna bestu e-fótbóltsspælararnar í Føroyum, og hesi skulu síðani manna føroyska landsliðið, ið skal fáa Føroyar til UEFA eEURO 2020 endaspælið, sum verður í London í døgunum 9. og 10. juli komandi ár.
Kappast verður á Konami eFootball PES 2020, og sambært Konami, ið er framleiðarin av spælinum, verður hetta størsta e-fótbóltskapping nakrantíð fyri landslið.
Vinnandi e-landsliðið vinnur atgongumerki til EM-finaluna, sum verður á Wembley 12. juli, umframt eina peningaupphædd.
Lutakastið til e-undankappingina verður í januar mánað. Luttakandi londini verða býtt í tíggju bólkar, og verða e-undankappingardystirnar spældir “online” í mars, apríl og mai mánað.
Í undankappingini spæla londini tvær ferðir móti hvør øðrum, og síðani fara 16 lond til endaspælið, har tey fara at kappast um at gerast fyrsti UEFA eEURO 2020-meistari.
Fótbóltssambandið fer í næstu viku at kunna nærri um, hvussu e-kappingin verður skipað í Føroyum.
Vinarliga broyt tínar kennifíla - og privatlívsstillingar fyri at síggja hetta innihald