Fyrstu hálvfinalurnar hjá kvinnum verða spældar mikukvøldið

Leygardagin vann Stjørnan fjórðingsfinalu á VÍF í Klaksvík, og í gjár gjørdist talan um stórsigur til heimaliðið, tá StÍF vitjaði Neistan í Høllini á Hálsi. Harvið gjørdist greitt, at Stjørnan og Neistin skulu spæla FM-hálvfinalur móti ávíkavist H71 og Kyndli.

Les eisini: 
Neistin vann stórt á STíF í fjórðingsfinaluni
Stjørnan sigraði í fjórðingsfinaluni
Myndir: Stjørnan - VÍF

Í gjárkvøldið varð skráin fyri hálvfinalurnar kunngjørd á hsf.fo. Fyrstu hálvfinalurnar vera mikudagin.


(Skíggjamynd: Hondbóltssamband Føroya)

H71 er samanlagt stórfavorittur móti Stjørnuni, men síðst liðini hittust, var bert eitt mál á muni. Heimavøllurin mikukvøldið kann gera mun hjá Stjørnuni, umframt serførleikarnir í álopi og verju hjá liðnum. Leygardagin gjørdu Sonja Sirdal á Bergi og serliga Tóra Eliasen stóran skaða á VÍF, og serliga miðverjan var eisini stinn.

Sí samrøður frá leygardagin: 
Tóra Eliasen: - Orkan og skjótleikin hjá okkum gjørdu munin
Ingi Olsen: - Verjan hjá okkum verður hálað sundur

Toppgóðskan og samlaða góðskan á H71-liðnum er tó ógvuliga høg, og málið í Hoyvík er greipan. Nógvir møguleikar eru í krútsterku bakketuni, tær á vonginum standa fyri nógvum málum, og verjan er eisini krútsterk.

H71 og Kyndil hittust í steypafinaluni. Um Kyndil eisini skal koma í FM-finalurnar, skal Neistin basast. Tætt var millum liðini í grundspælinum. Kyndil hevur málskjúttar sum Turið Arge Samuelsen og Nadju Pejovic og Jovanu Strajanac í málinum, og Neistin hevur eitt spenanndi ungt lið við Mariu Pálsdóttir Nólsoy á odda. Marjun Falkvard Danberg kemur eisini við royndum og góðsku.

FM-hálvfinalur í SMS-deildini
Mikudagin 19.04 (1)

18.30: Stjørnan - H71
20.00: Neistin - Kyndil 


Leygardagin 22.04 (2)

18.00: H71 - Stjørnan

Sunnudagin 23.04 (2)

15.00: Kyndil - Neistin


Um neyðugt er við hálvfinalu 3, so verða tær/verður tann spæld í næstu viku. Liðið sum vinnur tvær hálvfinalur spælir seg í FM-finaluna.