HB og Víkingur hittast aftur í kvøld

Hetta var triðji dysturin á rað hjá Víkingi uttan ein sigur. Avrikið hjá heimaliðnum var tó fyri tað mesta heilt gott. Málskjúttin Arnbjørn Svensson, ið eisini var sannførandi í miðverjuni, kundi eftir vónbrotið eisini seta orð á, at nógvir partar av spælinum hjá Víkingi riggaðu.

Nú eru stig uppá spæl, og um hugt verður eftir stigatalvuni er greitt, at Víkingur hevur tørv á stigum fyri at bjóða av í topp-trý. Fyritreytirnar eru tó broyttar hjá víkingunum, sum eisini framvegis eru uttan leikbannaða Atla Gregersen, umframt Ari Olsen og Finn Justinussen, ið eru skaddir. Nógvir víkingar vístu seg tó væl fram mikukvøldið - millum annað ungir og óroyndir fyrstaliðsspælarar. 

Mynd: Sverri Egholm

Uppgávan er í kvøld er á útivølli, har teknisk sterku HB'spælararnir hava størri rásarúm. HB hevur vunnið tveir teir seinastu heimadystirnar móti júst Víkingi, og liðið hjá Dalibor Savic hevur bast bæði B36 og Víkingi í 2023. Aftur í kvøld er lykladystur, og HB skal nýta somu sinnisligu styrki men helst finna annað spæl fram, í mun til dystin í Sarpugerði.

Talan er um fyrsta dystin í umfarinum, og einasta dystin ið er á skránni í kvøld. Portalurin verður til staðar í Gundadali og hevur ymiskt tilfar.