Jan tekur eitt tørn afturat við barndómsfelagnum

ÍF hevur í 2023 eitt lið, har fleiri spælarar ikki eru so vanir at spæla í Betrideildini. Tá hevur tað nógv at siga, at hava nakrar royndar spælarar í hópinum, og í kvøld kann ÍF kunngerða, at ein av teimum lokalu við einari rúgvu av dystum á hægsta støði hevur skrivað undir:

- Tað er við stórari gleði vit kunngerða, at Jan Ólavsson Ellingsgaard, hevur valt at taka enn eitt ár í fremstu røð. Vit hava fleiri ungar leikarar á veg, og er tað tí sera umráðandi, at teir hava onkran, at stuðla seg uppat. Har er Jan ein av okkara allar royndastu leikarum. Hann er á faroesoccer skrásettur at hava leikt heili 396 dystir síðani 2006.

Jan Ellingsgaard hevur vant partvíst við í vetur og verið við til nakrar venjingardystir, men ein ávís óvissa hevur verið um, hvørs 32-ára gamli fór at spæla á hægsta støði ella ikki. Nú er tann ivin skúgvaður til viks.

Jan Ellingsgaard saman við Georges Rouah, eftir at nýggi sáttmálin millum partarnar er undirskrivaður (Mynd: ÍF)

Jan hevur fyriuttan eitt kappingarár bert umboðað barndómsfelagið ÍF í Føroyum. Tað var í 2017, tá verjuspælarin royndi seg í NSÍ og gjørdist steypavinnari har. Annars hevur fuglfirðingurin verið á besta liðnum hjá ÍF í 15 ár, og hevur samanlagt spælt 283 dystir í Betrideildini, umframt 29 í steypakappingini og sjey í Europa League.

Jan Ellingsgaard er upprunaliga vinstri vongur og vinstri bakkur, men hevur síðsti árini spælt mest í miðverjuni, umframt at hann eisini hevur roynt seg sum áleypara. Talan er um tekniskt sterkan spælara, sum eisini er góður í luftspælinum og er vandamikil í samband við millum annað deyðbóltsstøður. Royndi fuglfirðingurin er samanlagt skrásettur fyri 68 mál.

Vit síggja við spenningi fram ímóti kappingarbyrjan, og ynskja Jan hjartaliga tilukku við sáttmálanum, og bestu eydnu