Annað

Johan Sundstein kann vinna yvir 100 milliónir í dag

Johan er saman við liðnum OG í finaluni í heimsmeistarakappingini í Dota 2 í Shanghai.

Johan Sundstein (Mynd: BT)

Johan Sundstein (Mynd: BT)

2019-08-25 12:48 Author image
Alda Nielsdóttir

25 ára gamli føroyingurin Johan Sundstein er saman við liði sínum OG komin í finaluna í The International, sum er heimsmeistarakappingin í telduspælinum Dota 2.

Saman við liði sínum hevur hann møguleika at vinna 104 milliónir krónur í dag.

Í hálvfinaluni í gjár vunnu OG 2-1 á kinesiska liðið PSG.LGD, sum er sponsorerað av franska fótbóltsfelagnum Paris Saint-Germain.

Í dag er OG í finaluni móti Team Liquid.

Johan Sundstein og OG gjørdust heimsmeistarar í fjør, og vunnu teir tá 75 milliónir.

Vinna tey aftur í dag, kunnu teir fara heim við 15,5 milliónum dollarum, ið svarar til uml. 104 milliónir í okkara krónum.

The International er størsta e-sportskappingin í mun til peningavinningar. Í ár er samlaða upphæddin, sum verður latin, gott 230 milliónir krónur, sum er størsta upphæddin fyri eina e-sportskapping nakrantíð.

Sambært TV2 er Johan Sundstein 3. mest vinnandi e-sportsstjørnan í heiminum. Til samans hevur hann vunnið 5,4 milliónir dollarar, ið svarar til meira enn 36 milliónir í okkara krónum.

Mest vinnandi hevur vunnið gott 40 milliónir krónur, men vinnur Johan í dag, fær hann uml. 21 milliónir krónur av vinninginum, og verður hann sostatt mest vinnandi e-sportsstjørnan í heiminum.

Í ár verður The International hildin í Shanghai í Kina.

placeholder
placeholder