KÍ-spælararnir venja seg við hitan og grasið í Serbia

Ein flogtúrur til Danmarkar mánakvøldið. Ein flogtúrur víðari við leiguflogfari úr Keypamannahavn fyrrapartin týsdagin og síðani ein busstúrur í umleið tveir tímar í Beograd.

Sí eisini: Deni og KÍ eru komnir til Serbia

KÍ-ferðalagið kom seinnapartin í gjár uppá pláss í Kragujeva, har Radnicki 1923 hevur heimstað.

Serbiska mótstøðuliði verður størsti bitin higartil hjá KÍ í ár - og umstøðurnar hjálpa ikki beinleiðis: 

- Gras og umleið 30 hitastig

Fyrimunurin hjá KÍ er, at spælararnir hava roynt líkanndi nakrar ferðir áður. Fyrri Conference League-dysturin byrjar heldur ikki fyrrenn klokkan 20 lokala tíð, og tá er sólin ikki frammi - tað verður tó helst heldur slavið í luftuni.

Grasundirlagið á leikvøllinum verður eisini betri enn tað, sum KÍ-liðið vandi á í gjárkvøldið.

Sebastian skal verja málið

Eftir hálvan tíma í heimadystin móti SJK Seinajoki í síðstu viku avloysti ein dani ein annan dana í KÍ-málinum. 

Fasti fyrsti málverjin, Mark F. Jensen, fekk ein arðan stoyt í høvdið tíðliga í dystinum. Hann sá viðtikin út, men Mark spældi víðari eina løtu, eftir at hann stóð neyðugu læknaligu royndirnar.

Tó vísti tað seg skjótt, at KÍ-málverjin var ov viðtikin. Hann tyktiskt "groggy" og setti seg niður. Síðani varð Mark Jensen borin av vølli og sendur á Landssjúkrahúsið til kanningar.

Mynd: Sverri Egholm

Sebastian John avloysti landsmannin. Hann hevði ikki nógv at gera, men tað, ið var, gjørdi John lýtaleyst.

Nú er greitt, at tað verður fyrrverandi 07 Vestur-málverjin, sum skal spæla móti Radnicki í morgin. Mark Jensen fekk heilaskjálvta  men hevur tað eftir umstøðunum gott. Hann er tó ikki við í Serbia, staðfestir bolt.fo.

Annars eru so at siga allir KÍ-spælararnir tøkir

Conference League 2. umfar - fyrru dystirnir
Hóskvøldið 24. juli 
19.00: Radnicki 1923 - KÍ

Tað er framvegis heldur óvist, hvussu er við stroyming.