Nógv glað børn til venjingar í Suðuroynni

Vanliga eru fótbóltsmennararnir hjá FSF knýttir at hvørjum sínum feløgum, har teir vitja og vegleiða venjarunum í feløgunum, men seinastu dagarnar hevur alt toymið verið saman um vitjanir í feløgunum í Suðuroynni. Samanlagt hava mennararnir verið á vøllunum og havt út ímóti 20 venjingar við barna- og ungdómsliðunum í oynni.

Móttøkan hevur verið avbera góð; bæði á og uttanfyri vøllirnar, sigur Pætur S. Clementsen, tekniskur stjóri við heimasíðuna hjá Fótbóltssambandinum

– Eftir okkara tykki hevur hetta eydnast ótrúliga væl, og vit hava fingið heilt nógv burturúr. Uppmøtingin til venjingarnar var framúr góð, og í øllum feløgunum sóu vit nógv fótbóltsglað børn, sum dámdu væl at venja. Áhugin tykist eisini vera stórur hjá venjarum og øðrum rundanum feløgini, og tað hevur eisini nógv at siga, sigur Pætur S. Clementsen

– Vit velja nú at varpa eyka nógv ljós á U11 av ymiskum orsøkum. Tað er ein áhugaverdur og týdningarmikil aldursbólkur, tí kanningar vísa, at børn í hesum aldrinum læra sera nógv og skjótt. Tey kunnu tí mennast sera nógv í tí tíðarskeiðnum, og tey gerast meira tilvitaði um fótbólt sum meira enn ‘bara’ spæl. Tí er tað týdningarmikið, at vit brúka spælið til at geva teimum dygdargóða venjing og læra tey so nógv sum gjørligt í tí aldrinum, greiðir tekniski stjórin frá.

Hetta var alt umrøtt á fundi við ungdóms- og barnavenjarar í oynni, og komandi tíðina verður hetta eisini eitt átaksøki, sum mennararnir fara at arbeiða við saman við restina av feløgunum í landinum.

Fótbóltssamband Føroya - fleiri myndir á heimasíðuni