Sama støða í botninum og í topp-fýra stríðnum

Stórfavorittarnir vunnu á heimavølli, tá teir báðir seinastu dystirnir í 23. umfari av Betrideildni vórðu spældir seinnapartin.

B36 vann 3-0 í gjár, men NSÍ svaraði aftur við at vinna 3-0 á ÍF við Løkin í dag. Longu eftir fimm minuttir sló Steffan Løkin til eftir langt innkast. Hann stóð púra fríur í ÍF-brotsteignum, tók bóltin væl til sín og skoraði hegnisliga. Níggjunda málið hjá Steffani, sum hevur havt eitt gott kappingarár.

ÍF er so gott sum farið niður, og umsstøðurnar at svara NSÍ aftur á degnum gjørdust verri, tá Aron Knudsen fekk beinleiðis reytt kort í 32. minutti. Hetta fyri at støðga Jasper van der Heyden sum aftasti maður. Fuglfirðingar fullu tó ikki heilt í fátt, og dysturin varð ikki avgjørdur heilt fyrrenn síðsta korterið, tá brøðurnir Knudsen, Petur og Aron, skoraðu hvør sítt mál. Aftur fimm stig niður til B36, og nú eru bert fýra umfør eftir.

Aron Knudsen skoraði seinasta málið í sigrinum, sum sendi NSÍ nærri evropeiska plássinum: Fýra umfør eftir og nógv skal ganga galið fyri liðið hjá Jens Wedeborg (Savnsmynd: Sverri Egholm)

Triðji 3-0 dysturin í umfarinum kom í Gundadali. Eisini har fekk ovara liðið hol á tíðiliga: Gott HB-spæl í høgru, og Mathias Voss væl innfyri til Jákup Thomsen. Fyrsta málið hjá Jákupi í Betrideildini í 13 mánaðir - hann hevur verið úti við skaða størsta partin av hesum árinum.

Áleyparin sló til aftur, tá ein tími var spældur. Hetta var eftir gott innlegg frá Hanusi Sørensen. Hanus skoraði sjálvur trygt tígjgu minuttir seinni, eftir at ein annar ungur HB'ari, Eivind Restorff Mouritsen, hevði vunnið bóltin og sent hann víðari. Tryggur sigur til Sormani og hansara menn, sum eftir trý tap eru aftur á sigurskós. Skála skal hava stigini í niðurflyringarstríðnum aðrastaðni.

Betrideildin 23. umfar
Í dag, sunnudagin 22. september:
NSÍ - ÍF 3-0 (1-0)
6' Steffan Løkin (James Drye) 1-0
76' Petur Knudsen (Beinir Nolsøe) 2-0
90 (+3)' Aron Knudsen (Mórits Heini Mortensen 3-0)

Reytt kort: Aron Kensson, ÍF (32')

Les meira um dystin her

HB - Skála 3-0 (1-0)
11' Jákup Thomsen (Mathias Voss)
61' Jákup Thomsen (Hanus Sørensen)
72' Hanus Sørensen (Eivind Restorff Mouritsen)

Ígjár, leygardagin 21. september 
Víkingur - EB/Streymur 1-0 (1-0)
39' Jørgin Nielsen (Ingi Jonhardsson) 1-0

Sí meira um dystin her

B68 - KÍ 0-2 (0-1)
9' Sjálvmál 0-1
90 (+1)' Árni Frederiksberg (Páll Andrasson Klettskarð) 

Sí meira um dystin her

Sí eisini: Endaliga FM-avgerðin kann fella mikudagin

07 Vestur - B36 0-3 (0-1)
18' Anton Søjberg 0-1
57' Marius Kryger Lindh 0-2
65' Marius Kryger Lindh 0-3

Sí eisini: B36 nærkaðist aftur NSÍ

Støðan í Betrideildini: