Serligt ítróttatilboð til næmingar á serbreytini

Í samstarvi við serbreytina á Miðnámi á Kambsdali fer Parasport Føroyar nú at bjóða eitt serligt venjingartilboð til næmingar, ið vilja tvinna saman ítrótt og útbúgving.

Serbreytin er serlig breyt fyri tey, ið eru tarnað at gjøgnumføra miðnám undir vanligum treytum, hóast teir stuðulsmøguleikar, sum eru í vanligu skúlaskipanini.

Við at samantvinna miðnámsskúla og venjing ynskir Parasport at geva næmingunum á serbreytini, sum ynskja at íðka ítrótt, eitt spennandi tilboð.

– Vit ynskja bjóða ungum við serligum avbjóðingum eitt munagott ítróttartilboð og vónandi eisini fáa fleiri at íðka ítrótt. Tí royna vit nú hesa skipan, sum er fyri tey, ið veruliga ynskja at íðka ítrótt. Hesi fáa nú møguleikan at samantvinna venjing og miðnám. Í tímatalvuni verður gjørt pláss fyri tveimum venjingum í frælsum ítrótti um vikuna, sigur Tróndur Ravnsfjall, ítróttaráðgevi fyri Parasport Føroyar.

Málbólkurin eru íðkarar av báðum kynum, sum veruliga vilja royna seg við frælsum ítrótti. Her verður til dømis hugsað um næmingar, sum við tíðini kunnu koma upp á tal at royna seg í kappingum uttanlands.

- Á Kambsdali taka vit altíð væl ímóti samstørvum, ið kunnu stimbra gerandisdagin hjá næmingunum. At seráhugamál hjá næmingum og skúlagongd samstarva og ganga hond í hond er ein vinningur fyri báðar partar. Í fjør gjørdu vit eina avtalu við FSF, og tað hevur eydnast væl. Tí fegnast vit nú um, at Parasport Føroyar sum tað næsta sersambandið undir ÍSF, eisini tekur stig til slíkt samstarv, sigur Páll Isholm, rektari.

Fram til summarfrítíðina er “Parasport ítróttartilboðið” í størstan mun ætlað teimum næmingunum, sum eru knýttir at serbreytini. Ætlanin er tó eisini at gera líknandi tilboð fyri ung, ið ganga á hinum breytunum, og sum hava kroppsligar avbjóðingar ella rørslutarn.

Ung fólk, sum ikki ganga á miðnámsskúla, kunnu eisini søkja um upptøku á “Parasport venjingartilboðnum”. Tey hava sjálvi ábyrgd av at avtala við møguligan arbeiðsgevara, dagtilboð ella skúla, at viðkomandi kann møta til ásettu venjingarnar, sum eftir ætlan verða týsmorgun og hósmorgun klokkan 8 til 09:30.

5. februar verður kunningarfundur á Miðnámi á Kambsdali um nýggja tilboðið.