StÍF kroysti Kyndil allan vegin

18 mál vóru á muni í fyrstu finaluni í SMS-deildini sunnudagin, tá StÍF so at siga ikki var til staðar og Kyndil – við øllum síndum dygdum og við stórari sannføring – gjørdi sum man lysti á Hálsi.

Søgan var ein heilt onnur á Skála í gjárkvøldið, har StÍF kom við ógvuliga heilstoyptum avriki. Sum Malene Madsen segði eftir dystin: Nú kundu tær hyggja í eyguni á hvørjari aðrari.

Sí samrøðu við Malene Madsen (StÍF) HER

Kyndil fekk støðgað sterka strikuspælinum hjá StÍF sunnudagin...

...men í gjár skoraði Malene fimm mál. Hon vann eisini StÍF nøkur brotskøst (Myndir: Sverri Egholm) 

Kyndil var annars á odda 16-13 í hálvleikinum, men slapp ongantíð heilt avstað frá heimaliðnum, sum í tveimum pørtum av 2. hálvleiki eisini var heilt omaná og einaferð á odda við tveimum málum.

Hetta var serliga við stríðsvilja og við at finna røttu álopsloysnirnar – um tað var við innspølum til stóru og sterku Malene Madsen, langskot frá Emmu Skovmand, ymiskt frá Natasju Hammer ella vongskot frá Yuriku Korimoto.

Natasja í framlopi

Um StÍF hevði vunnið, hevði Yurika Kurimoti verið dagsins "MVP". Japanski bakspælarin/vongurin var við at vinna FM í 2021 - í gjár vardi hon fyrimyndarliga yvirfyri besta spælaranum í deildini, umframt at Yurika skoraði fimm ferðir av vonginum 

Jovana Stranjanac var tó aftur stinn í Kyndlismálinum við nógvum góðum bjaringinum - millum annað eftir vongskot (Myndir: Sverri Egholm)

Sí allar myndirnar av Skála í gjár

Yurika hevði ótrúliga gott tamarhald á Turið Arge Samuelsen. Japanski útispælarin hjá StÍF framdi uppgávuna við mansverju/sum høgur 2'ari við nógvari hugsavnan. Besti álopsspælarin í SMS-deildini kom ongantíð av álvara inn í dystinum, hóast Turið skeyt fimm mál - tíggju færri enn í fyrstu finaluni har hon nærum avgjørdi fyrstu tjúgu minuttirnar.

Hetta ørkymlaði tær grønu, ið leitaðu eftir loysnum í fleiri førum, har tað gjørdist stirvið og hakkut. StÍF-verjan var samanlagt eisini stinn, og Momoko Debes hevði umráðandi bjargingar, sum hildu heimaliðnum inni í dystinum.

Momoko Debes (f. Nakamura) 

Ein sjáldsom sjón í gjár: Frítt skot til Turið Arge Samuelsen. Hon fekk tó nøkur góð mál 

Blaðunga Joan Johannesen skoraði fýra mál av vonginum og millum annað nøkur týðandi mál seinastu løtuna. Inga Maria Roysdóttir, ið eisini er lám, gjørdi eisini tað (Myndir: Sverri Egholm)

Trupulleikin fyri StÍF var, at Jovana Stranjanac samanlagt hevði ein betri dyst í hinum málinum, og seinastu løtuna hevði Kyndils-verjan gott tamarhald á. StÍF manglaði nakað av megi og seinasta skerpni – tey í heimaleguni saknaðu eisini nakrar útvísingar.

Kyndil gjørdi nóg mikið til at knógva tí. Millum annað var umráðandi, at ungu Joan Johannesen og Inga Maria Roysdóttir fingu nøkur mál í høgru síðu, og at Nadja Pejovic hevði tvey heilt góð langskot, tá tað var læst. Tá hon økti til 23-26 við dundurskotii við trimum og einum hálvfum minutti eftir á klokkuni, var nærum greitt, at Kyndil fór at vinna. StÍF minkaði tvær ferðir, men ov seint var.

Tær í grønum fegnaðust - eitt sindur - men mest av øllum tyktust tær lættar yvir sigurin á Skála, har stuðulin til serliga heimaliðið var frálíkur, og har spenningur og inntensitetur var allan vegin.

Turið Arge Samuelsen viðurkendi eisini í viðtali við Portalin, at hetta ikki var úttrykkið, sum Kyndil fór eftir:  Turið: gjørdist nógv tættari enn vit ætlaðu

Myndir: Sverri Egholm

Eftir úrslitið er greitt, at Kyndil kann avgera tað í næstu finaluni. Triðja finalan verður spæld leygardagin (4/5). Sum nú er, verður dysturin klokkan 15. Tað verður tó ikki á vanliga heimavøllinum hjá Kyndli á Hálsi. Hetta er av tí, at stórt tiltak verður í tí ítróttarhøllini. Ístaðin verður Hoyvíkshøllin karmur um dystin.

FM-finala nummar tvey í SMS-deildini
Í gjár, mikudagin 1. mai
StÍF (0) - Kyndil (2) 25-26 (13-16)

Toppskjútti: Natasja Hammer 8 mál
Sí dómaraseðil og dystargongd her

Fyrsta liðið sum vinnur tríggjar finalur gerst føroyameistari

Triðja FM-finalan
Hoyvíkshøllin, leygardagin 4. mai

Sí eisini: 
Myndir: StÍF - Kyndil
Malene Madsen: - Kunnu hyggja hvørja aðra í eyguni eftir dystin
Turið Arge Samuelsen: - Gjørdist nógv tættari enn vit ætlaðu