Stór føroysk og evropeisk uppgerð í Göteborg í kvøld

Allan Norðberg og Valur spældu seg trygt víðari úr fjórðingsfinalunum í European Cup og eru nú nær finaluplássið. Elias Ellefsen á Skipagøtu og THW Kiel spæla fyrru fjórðingsfinaluna í Champions League í Montpellier mikudagin - í morgin. Í kvøld skulu tríggir føroyingar í eldin í næststerkastu evropeisku kappingini.

Fyrru fjórðingsfinalurnar í European League eru á skránni, og lagt er upp til eitt spennandi norðurlendskt brak í Partille, beint við Göteborg. Flensburg-Handewitt er úr Norðurtýsklandi og hevur eina rúgvu av skandinaviskum spælarum - millum annað størstu svensku hondbóltsstjørnuna, Jim Gottfriedsson.

Harvið er eyka stórur áhugi í Svøríki fyri dystinum: Tað var tað eisini áðrenn, tí tað er ikki seriga vanligt at svensku feløgini koma so langt í Evropa. Óli Mittún er ein av lyklunum til, at tað skal eydnast at bjóða týsku risunum av. 18-ára gamli hoyvíkingurin hevur verið framúrskarandi í higartil flotta árinum hjá Sävehof.

Tað verður allarhelst ein havnarmaður, sum verður á høgra vongi hjá Flensburg - í hvussu so er ein part av dystinum. Jóhan á Plógv Hansen er vanliga tryggur og skal royna at gera sítt fyri at fáa ein av favorittunum í kappingini nærri hálvfinalunum.

Jóhan á Plógv Hansen er í gongd við sítt annað ár í týska stórfelagnum. Liðið jagstrar nú eitt evropeiskt steyp 

Hákun West av Teigum og Füsche taptu, eins og Jóhan og teir, steypahálvfinalu fyri kortum. Meistarastríð og evropeiskt stríð er framvegis eftir (Savnsmynd: Sverri Egholm)

Hákun West av Teigum og Fücshe Berlin eru favorittar í sínari uppgerð við fronsku steypavinnararnar. Nantes vitjar týska høvuðsstaðin í kvøld, og Fücshe skal skapa sær gott útgangsstøði.

Liðið misti týðandi fet í oddastríðnum við javnleikinum móti Kiel sunnudagin. Tá spældi Hákun West av Teigum als ikki - Hans Lindberg spældi fulla tíð. Helst fær 21-ára gamli hoyvíkingurin ein leiklut í kvøld.

European League - fyrru fjórðingsfinalur við føroyingum
Í kvøld, mikudagin 23.04

17.45: IK Sävehof - Flensburg-Handewitt

19.45: Fücshe Berlin - Nantes

Dystirnir síggjast á ehftv.com