Sverri var skjótastur í hálvfinalunum

Miðvingurin Sverri Sandberg Nielsen róði seg í dag tygt í finaluna um evropameistaraskapin í single scullara.

Hálvfinalurnar vóru í dag, og Sverri hevur bestu tíðina av øllum, sum róðu seg í finaluna. Hann róði teir 2.000 metrarnar í tíðini 6 minuttir og 45,92 sekund.

Norðmaðurin Kjetil Borch, sum vann hina hálvfinaluna brúkti 6 minuttir og 47,49 sekund.

Finalan verður í morgin. Sverri Sandberg Nielsen segði við útvarpið fyri løtu síðani, at hann fer at gera sítt besta í finaluni, og at tað vónandi verður gott nokk at vinna eitt EM-heiðursmerki.