Innsent
Føroyameistarnir úr Sandavágs Talvfelag løgdu bragdliga fyri og gjørdu bart í fyrsta dystinum móti Kollafjarðar Talvfelag. Vágamenn vunnu á øllum fýra borðum. Manningin er tann sama sum í fjør: 1. Høgni Egilstoft Nielsen 2. Rógvi Egilstoft Nielsen 3. Silas Eyðsteinsson 4. Torkil Nielsen.
Fyrsta lið hjá Havnar Telvingarfelag, sum má metast sum størsti avbjóðarin hjá sandavágsmonnum, snávaði móti næstbesta liði felagsins. Dysturin endaði 2-2. Helgi Dam Ziska og Martin Poulsen gjørdu sína skyldu á ovaru borðunum, men á aftaru borðunum taptu Luitjen Apol (yngri) og Rógvi Mortensen fyri ávikavist Margar Berg og Jóannes V. Hansen.
Í triðja dystinum í 1. deild vunnu klaksvíkingar tryggan sigur á vestmenningum, sum nú aftur eru í fremstu deildini. Klaksvíkar Talvfelag vann 3½-½. John Jacobsen - føroyameistari í 1978 - var hin einasti av vestmenningunum, sum helt tørn. Hann og Steintór Rasmussen telvaðu javnt á øðrum borði.
Úrslitini í 1. umfari í 1. deild: Havnin A-Havnin B 2-2, Sandavágur-Kollafjørður 4-0 og Klaksvík-Vestmanna 3½-½. Í øðrum umfari sunnudagin verður telvað soleiðis í 1. deild: Sandavágur-Havnin B, Vestmanna-Havnin A og Kollafjørður-Klaksvík.
HT og ST favorittar
Sandavágs Talvfelag hevur sum nevnt somu manning sum farna vetur. Havnarmenn hava at kalla eisini somu manning, men har verða helst fleiri, sum fara at skiftast. Nýggjur á liðnum er tann einans 13 ára gamli Luitjen Apol, sum hevur tikið seg heilt nógv fram, og nú stendur við sama styrkitali (2129), sum stórmeistari okkara, Helgi Dam Ziska, hevði um hansara aldur.
Hesir sjey manna 1. lið hjá Havnar Telvingarfelag í vetur: 1. Helgi Dam Ziska 2. Martin Poulsen 3. Olaf Berg 4. Carl Eli Samuelsen 5. Sjúrður Thorsteinsson 6. Luitjen Apol (yngri) 7. Rógvi Mortensen.
Telvað verður eisini í 2.- og 3. deild í landskappingini. Í alt níggju feløg kappast í teimum trimum deildunum.
Helgi remis móti World Cup vinnara
Í september var føroyski stórmeistarin Helgi Dam Ziska á øðrum sinni við í World Cup-kapping í Russlandi. 128 telvarar úr 47 londum vóru við. Telvað var eftir cup-skipanini.
Eins og árið fyri fekk Helgi ein av heimsins bestu telvarum í fyrsta umfari - Teimour Radjabov úr Aserbadsjan. Eins og undanfarnu ferðina eydnaðist føroyska stórmeistaranum at fáa annað av talvunum javnt. Hitt tapti hann.
Helgi reyk tí út í fyrsta umfari, men kann ugga seg við, at Radjabov fór allan vegin heilt fram í finaluna, sum hann vann á kinesiska stórmeistaranum Ding Liren.
EM byrjað
Í gjár byrjaði EM-stevnan fyri landslið í talvi. Føroyar eru ikki við hesaferð. Talvsamband Føroya hevði sett sum krav, at allir av fremstu fimm føroysku telvarunum vóru tøkir, skuldi nakað lið sendast til kappingina, men tað eydnaðist ikki. Brøðurnir Høgni og Rógvi Egilstoft Nielsen eru upptiknir av fótbólti, og Helgi Dam Ziska samdist ikki við Talvsambandið um treytirnar fyri hansara luttøku.
Mest óvæntaða úrslitið í fyrsta umfari í EM-kappingini var, at Danmark púra óvæntað spældi javnt 2-2 móti Russlandi, sum er favorittur og styrkismett nummar eitt av teimum 40 liðunum í kappingini. Føroyar hava tvær ferðir verið við í EM-stevnuni í talvi, og hava fingið fleiri góð úrslit, tó at mótstøðan er ógvuliga hørð.
Topp 10
Á nýggjasta topp-10 yvirlitinum yvir føroyskar telvarar er røðin henda:
1 GM Helgi Dam Ziska, HT, 2533
2 Høgni Egilstoft Nielsen, ST, 2413
3 Rógvi Egilstoft Nielsen, ST, 2382
4 IM John Arni Nilssen, KTF, 2328
5 IM John Rødgaard, VT, 2294
6 Martin Poulsen, HT, 2266
7 Olaf Berg, HT, 2225
8 Flóvin Tór Næs, HT, 2223
9 Carl Eli Samuelsen, HT, 2188
10 Hans Kristian Simonsen, KT, 2180
Vinarliga broyt tínar kennifíla - og privatlívsstillingar fyri at síggja hetta innihald