Ingi Samuelsen
Okkurt bendir á, at týski venjarin hjá franska fótbóltsfelagnum Paris Saint-Germain, Thomas Tuchel, hevur fingið sekkin.
Tað var týska Sky Sports, sum í morgun bar tíðindini um, at Tuchel er koyrdur sum venjari í franska stórfelagnum.
PSG liggur í løtuni á triðja plássi í Ligue 1, eitt stig aftanfyri oddaliðið, Lyon.
Høvuðsstaðarfelagið hevur annars verið einaráðandi í fronskum fótbólti hesi seinastu árini, men ikki í ár. 35 stig fyri 17 dystir í ár er eftir øllum at døma ikki nóg gott fyri felagið, sum nú sleppir sær av við Thomas Tuchel.
Sambært týska miðlinum Bild fekk Tuchel boðini í gjárkvøldið. 47 ára gamli Thomas Tuchel hevur staðið á odda fyri PSG síðan á sumri 2018. Áðren tað var hann venjari hjá bundesligafelagnum Borussia Dortmund
Tað frættist, at PSG roynir at fáa fyrrverandi venjaran hjá Tottenham, argentinska Mauricio Pochettino, at taka yvir. Pochettino spældi í síni tíð sjálvur eitt skifti við Paris Saint-Germain.
Vinarliga broyt tínar kennifíla - og privatlívsstillingar fyri at síggja hetta innihald