Elias er javnsettur HM-toppskjútti eftir bólkaspælið

Hannover, Týskland (Portalurin) -Tríggir dystir og tríggir sigrar. Hetta er úrttøkan hjá føroyska U21-landsliðnum í HM-endaspælinum í Týsklandi higartil. Fyrsta plássið í innleiðandi bólkaspælinum merkir, at Føroyar fáa tvey stig við sær víðari til høvuðsumfarið í Hannover. Til ber at lesa meira um "roknistykki" har á leinkjuni niðanfyri.

Les eisini: Nú snýr tað seg um høvuðsumfarið í Hannover

Tað er helst eingin, sum hevur fylgt føroyskum hondbólti seinastu árini, ið undrast yvir, at Elias Ellefsen á Skipagøtu og Hákun West av Teigum hava spælt lyklaleiklut - serliga í føroyska álopsspælinum. Teir skulu til Bundesliguna skjótt, spælskiparin til THW Kiel og høgri vongurin til Füchse Berlin, og báðir skulu spæla væl, um Føroyar skulu koma langt í hesari kappingini.

Higartil hava teir víst seg væl fram. Báðir vóru 100 prosent, hvat skotum viðvíkur í dystinum móti Angola, tá teir bert spældu í 18 minuttir. Móti Japan fingu báðir ellivu mál, og Hákun var aftur javnsettur toppskjútti í gjárkvøldið, tá Føroyar koppaðu sponsku evropameistarunum. Elias skoraði sjey ferðir, og legði annan dystin á rað upp til tvísiffrað tal av málum.


Hákun West av Teigum skorar her uppá eitt av sínum tíggju skotum móti Spania (Mynd: Sverri Egholm)

Sí eisini: 
Elias: - Ein tann besti hálvleikurin vit nakrantíð hava spælt
Hákun: Fari at royna at skora hvørja ferð í næsta dysti

Eingin hevur skorað fleiri enn 26 mál í kappingini higartil. Elias Ellefsen á Skipagøtu hevur júst 26 mál, og harvið beint undir níggju mál í miðal fyri hvønn dyst. Júst tað sama hevur japanski Naoki Fujisaka - vinstri bakkurin, sum spældi væl móti Føroyum. Teir báðir eru javnsettir toppskjúttar higartil.

Hákun West av Teigum hevur júst átta mál í miðal fyri hvønn dyst. Høgri vongurin úr Hoyvík hevur skorað 24 mál og er harvið á 3. plássi á toppskjúttalistanum fyri bólkaspælið. Hann hevur eitt nakað hægri prosenttal enn Elias á Skipagøtu.


Almenni listin við tveimum føroyingum í topp-trý (Mynd: Handball World)

Les eisini: Elias og Hákun vístu vegin og sítt virði

Føroyar spæla móti Brasil í annaðkvøld klokkan 17. Higartil hevur liðið skorað 107 mál - sí hagtøl hjá Hákuni og Eliasi niðanfyri: 

Elias Ellefsen á Skipagøtu: 26 mál (6 brotskøst), 38 skot = 68 prosent
Hákun West av Teigum: 24 mál (2 brotskøst), 30 skot = 80 prosent