Elsa fyri fyrstu ferð á A-landsliðnum

Ein útskifting er í kvinnulandsliðshópinum, sum skal møta Eysturríki á heimavølli mikudagin 2. mars og á útivølli leygardagin 5. mars.

Hesum boðar Hondbóltssamband Føroyar frá í dag.

Durita Christophersen Jojic, sum skoraði tíggju mál í toppdysti í gjár, og sum er umráðandi í serliga verjupartinum á landsliðnum, hevur givið avboð. Í hennara stað hevur landsliðsvenjarin Sonni Larsen úttikið Elsu Egholm úr H71.

18-ára gamla Elsa, ið spælir sum bakkur í verju og álopi, var ein av eyðsýndu leikarunum á U19-landsliðnum, sum millum annað vunnu á Hollandi og Norðurmakedonia í European Championship í fjør summar.

Elsa í evropeiskum dysti fyri H71 (Mynd: Sverri Egholm)