Helgi Hoydal skal nú venja H71-kvinnurnar

Stutt eftir steypafinalusigurin hjá monnum varð kunngjørt, at Mark Lausen Marcher gevst í H71. Tíðin røkkiir ikki til hetta, samstundis sum hann er ítróttarstjóri í Hondbóltssambandinum.

Nú er greitt, at enn ein venjarabroyting er í H71. Hesaferð er tað á besta kvinnuliðnum.

Mathias Rettig kom til felagið á sumri 2023 sum hjálparvenjari hjá kvinnum. Hann tók síðani yvir sum høvuðsvenjari til hetta kappingarárið. Umframt hetta er danin ungdómsvenjari í felagnum.

Hetta seinna fer hann sum skilst at halda fram við í eina tíð, men samstarvið við H71 viðvíkjandi SMS kvinnum er av. 

Hetta hevur Portalurin fingið váttað frá fleiri keldum í kvøld. 

H71 er á 3. plássið í SMS-deildini. Liðið tapti fyri Neistanum í hálvfinalunum í steypakappingini, har leiðslan varð tveitt burtur í 2. hálvleiki í seinna dystinum á heimavølli.

Mathias Rettig uttast til høgru undir dysti hjá H71 (Mynd: Sverri Egholm)

Helgi tekur yvir 

Restina av árinum verður tað eitt vælkent andlit, sum skal stjórna H71. Talan er um Helga Hildarson Hoydal, sum í fjør vendi aftur til barndómsfelagið eftir nógv ár uttanlands.

Helgi er ungdómssvenjari í Hoyvík. Hann hevur leingi verið darvaður av einum skaða í alboganum men fær helst ein leiklut móti endanum av kappingarárinum hjá steypavinnarunum.

Samstundis skal hann standa á odda fyri kvinnuliðnum, sum í løtuni stendur til at skula spæla FM-fjórðingsfinalu.

Gilli Lorenzen, sum hevur verið hjálparvenjari hjá Rettig, heldur fram í sessinum.