Fótbóltur

Í kvøld skal Team Klaksvík í evropeiska eldin

Bosnisku vertirnir eru á pappírinum greiðir favorittar móti føroyska felagnum, sum á fyrsta sinni spælir slíkan dyst.

Jens Pauli Poulsen í fjórðingsfinaluni í Kollafirði í fjør. Klaksvíkingurin var avgerandi í avgerandi dystinum fyri hesi luttøkuni (Mynd: Sverri Egholm)

2023-09-15 10:22

Agnar Prestá

Mikudagin seinnapartin fór Team Klaksvík ferðalagið úr Vágunum. Endastøðin var bosniski býurin Tuzla, har Team Klaksvík næstu dagarnar skal spæla søguligar dystir.

Liðið endaði aftur við bronsuheiðursmerkjum í Burn-deildini í fjør, og avgerð varð tikin um at melda til European Cup, ið er triðsterkasta kappingin fyri lið hjá IHF. Team Klaksvík og Neistin eru í 1. umfari. Talan er um 1/64-finalurnar.

Les eisini: European Cup: Neistin og Team Klaksvík skulu nú royna seg

Hópurin áðrenn fráferð (Mynd: Team Klaksvík)

Neistin spælir báðar sínar dystir í Føroyum, meðan Team Klaksvík spælir báðar sínar dystir í Bosnia&Hersegovina. Hetta er eftir avtalu millum liðini í einstøku uppgerðunum.

Sambært veddingarfyritøkum er Sloboda Tuzla stórfavorittur, men tað er helst ilt at siga, júst hvar Team Klaksvík liggur í slíkum høpi.

Talan verður tó helst um eina ógvuliga stóra avbjóðing í dystinum, sum byrjar klokkan 18.30 føroyska tíð. Hópurin hjá Team Klaksvík ferðaðist umvegis París til Zagreb. Úr kroatiska høvuðsstaðnum gekk leiðin við bussi til Bosnia. Í gjár var venjing á skránni, og nú stendur fyrsta evropeiska uppgávan fyri framman.

Vinarliga broyt tínar kennifíla - og privatlívsstillingar fyri at síggja hetta innihald