Jóan Símun er klárur

Fyrireikingarnar til fyrstu dystirnar í UEFA Nations League kappingini 2022/2023 eru av álvara farnar í gongd.

Fyrstu dagarnar heldur hópurin til á Gloria Sports Arena í Antalya, har umstøðurnar eru framúr goðar, og seinnapartin hósdagin verður fari til Istanbul, har dysturin verður spældur leygardagin klokkan 19:45, føroyska tíð, sum er klokkan 21:45 lokala tíð í Turkalandi.

Jóan Símun Edmundsson í Antalya í Turkalandi, har landsliðið fyrireikar seg til dystin leygardagin (Mynd: Hans Erik Danielsen / FSF)

Síðan eru tveir heimadystir á skránni. Týsdagin 7. juni móti Luksemborg, og leygardagin 11. juni koma litavar á vitjan á Tórsvølli. Fjórði dysturin í hesum umfarinum verður týsdagin 14. juni – á útivølli móti Luksemborg.

Í fyrstu atløgu vórðu 23 spælarar boðsendir til komandi landsliðsuppgávur, men samstundis bleiv boðað frá, at áðrenn fráferð fór ein spælari afturat at vera úttikin. Og valið fall á Jóan Símun Edmundsson úr Waasland-Beveren í Belgia.

– Vit hava fylgt væl við gongdini hjá Jóani Símun hesar seinastu mánaðarnar, og eg ivist ikki í, at hann hevur nógv at geva føroyska landsliðnum. Ein skaði í rygginum argaði fyrr í ár, men tí er tamarhald á, so vit eru glaðir fyri at hava hann við aftur, sigur landsliðsvenjarin, Håkan Ericson við heimasíðuna hjá FSF.