Sebastian Lau fekk tríggjar dystir leikbann - Jákup Vilhelmsen tveir

Eftir tíggju minuttir við Løkin sunnudagin yvirsatsaði Jákup Vilhelmsen í einari takkling á miðjum vølli, tá hann kom við knoppunum fremst, og leigusveinurin úr KÍ varð útvístir.

Tíðliga í 2. hálvleiki traðkaði Sebastian Lau Nielsen á ein liggjandi NSÍ-spælara og fekk beinleiðis reytt kort fyri svínsku gerðina. 

Í útvarpssendingini Fótbóltsprát mánadagin legði viðmerkjarin og venjarin Oddbjørn Joensen ikki fingrarnar ímillum: Hann helt, at nevndu B68-spælararnir svíktu liðið við gerðunum, og at hetta líktist ongum.

Sí eisini: Viðmerkjari: Hví kunnu hesir fótboltsspaelararnir ikki bara spæla fótbólt

Sí eisini: Heim til Svangaskarð við tvísiffraðum tapi

Tað var ikki bert Eiler Rasmussen, sum vístu reyði kortini í 11-0 dystinum, ella ein viðmerkjari í útvarpinum, ið heldur at spælararnir hjá B68 skulu revsast.

FSF hevur gjørt av, at Sebastian Lau Nielsen skal hava leikbann í tríggjar dystir, og at Jákup Norðoy Vilhelmsen skal hava tveir dystir. Tað skrivar bolt.fo í dag.

Hetta samsvarar eisini væl við vegleiðingina um leikbann.

Jákup Vilhelmsen í 1. umfari við Løkin (Mynd: Sverri Egholm)

Harvið missa danin og klaksvíkingurin dystin í Klaksvík í kvøld,og steypadystin móti ÍF mánadagin. Sebastian Lau Nielsen skal eisini sita uttanfyri til lykladystin á Eiði 13. apríl.

Eftirspælið eftir KÍ-EB/Streym er ikki av enn: Í løtuni verður viðgjørt, um Árni Frederiksberg skal hava leikbann, eftir at hann klípti Meinhard Geyta í neðra móti endanum sunnudagin. Hoyringin í tí málinum er sum skilst av í morgin. Tað er eisini møguligt, at Meinhard og venjarin Sigfríður Clementsen fáa bann í meira enn til dystin í dag.

Sí eisini: Spurningurin um leikbann er til viðgerðar