Slovan stendur sum favorittur til uppgerðina hóskvøldið

KÍ skal vinna fyri at framvegis hava møguleika at koma víðari úr Conference League bólkaspælinum. So greiðar eru treytirnar til føroyameistararnar hesa vikuna. 

Slovan Bratislava er trý stig frammanfyri KÍ í stríðnum um 2. plássið í bólkinum. Nógv bendir á, at Lille fer at tryggja sær víðari luttøku. Franska stórfelagið spælir í Ljubljana.

Magne Hoseth kann ikki nýta Árna Frederiksberg. Hann fekk reytt kort í 2-0 ósigrinum í Slovenia fyrr í mánaðinum. Harvið er greitt mest skapandi spælarin hjá KÍ ikki tøkur, og tað ger fyritreytirnar verri til dystin móti slovakisku meistarunum, ið kunnu spæla seg víðari við at fáa trý stig.

Árni Frederiksberg hevur lagt upp til trý av teimum fýra málunum hjá KÍ higartil í bólkaspælinum. Hann fara teir í bláum at sakna hóskvøldið (Mynd: Sverri Egholm)

Eitt stig verður helst eisini nóg mikið hjá Slovan, sum er ein lítil favorittur hjá veddingarfyritøkunum. Ein útisigur hóskvøldið gevur peningin beint yvir tvær ferðir aftur. Odds á KÍ-sigur liggja millum 3,25 og 3,40 - alt eftir hvør veddingafyritøka talan er um - meðan javnleikur er beint yvir tað.

UEFA Europa Conference League, bólkur A
5. umfar, hósdagin 30/11: 

17.45: KÍ - Slovan Bratislava

Støðan í bólkinum 
1. LOSC Lille 8 stig
2. Slovan Bratislava 7 stig
----------------------------
3. KÍ 4 stig
4. Olimpija Ljubljana 4 stig

Tvey lið koma víðari