Agnar Prestá
Sverri Sandberg Nielsen hevur verið á vatninum undir einum OL. Tað var hann eisini í Tokyo í 2021, har føroyingurin kom heilt í finaluna.
Tað vil hann sjálvandi aftur hesaferð, og nú 30-ára gamli miðvingurin róði innleiðandi róður fyri løtu siðani.
Áðrenn var so at siga eingin ivi um, at Sverri fór at enda í topp-trý í riðlinum, har fýra aðrir rógvar vóru við. Tó vóru størri iviamál um, hvussu tað fór at síggja út - serliga tí Sverri Sandberg Nielsen hevur verið darvaður av rygginum seinastu stóru vikuna, og hevur hann ikki vant nógv.
Tað sást tó ikki nógv aftur til tað á stilla vatninum í Vaires-Sur-Marne, har nakað av mótvindi var. Eftir nøkur tøk legði Sverri seg á odda, og hann vann eisini sannførandi.
At enda vóru beint yvir trý sekund niður til bulgarska Vasliev og yvir fimm sekund niður til Molnar úr Ungarn. Hesir koma við Sverri Nielsen í fjórðingsfinalurnar - rógvararnir úr Hong Kong og Paraguay skulu í "uppsamling", har nøkur pláss afturat eru uppá spæl.
Sverri Sanberg Nielsen fór av álvara frá hinum beint áðrenn 2.000 metra-teinurin var hálvrógvin og róði síðani "trygt". Tíðin á 2.000 metra teininum var 6.53.50, sum verður mett sum ein góð tíð. Hetta var tann fjórðbesta tíðin av teimum 33 í innleiðandi róðrunum
Hóast tað var greitt, at Sverri fór at vinna riðilin, setti miðvingurin meira ferð á bátin við føroysku flagglitunum heilt til endans. Hetta var, sambært viðmerkjaranum Sarah Lauritzen fyri at taka nøkur ódnartøk fyri veruliga at royna ryggin.
OL - Singlesculler hjá monnum
Innleiðandi, leygardagin 27.07. Riðil 6
1. Sverri Nielsen (Danmark), 6.53.50 - fjórðbest samanlagt
2. Bulgaria, 06.56.63
3. Ungarn 06.58.76
------------------
4. Hong Kong 07.00.29
5. Paraguay 07.14.14
Fyrsta royndin hjá Sverra í París-økinum er væl avgreidd. Hann skal rógva OL-fjórðingsfinalu týsdagin 30. juli - beint eftir ólavsøku.
Hin føroyingurin í OL skal rógva á ólavsøku. Sára Maria Johansen er við í danska kvinnáttaranum, sum sunnudagin 29. juli hevur innleiðandi róður.
Sí eisini: Sára hitti kongshjúnuni
Vinarliga broyt tínar kennifíla - og privatlívsstillingar fyri at síggja hetta innihald