Byrja móti Burundi

Næstu 12 dagarnar fara 32 lond at kappast um U19 heimsmeistaraskapið í hondbólti hjá monnum. Kappingin verður í leikt í Kroatia. Hetta er fyrstu ferð, at Føroyar eru við í júst hesari kappingini - góðu úrslitini í fjør tryggjaðu hetta.

Fyrsti dystur hjá Føroyum er móti Burundi. Landið eystarliga í Afrika er als ikki nakað hondbóltsstórveldi, hevur umleið 13 milliónir íbúgvar og er mett at vera eitt tað mest fátæka í heiminum. Hetta er ein dystur, ið Føroyar skulu vinna – og helst greitt.

Føroyska ferðalagið ferðaðist í gjár úr Danmark til Opatija í Kroatia, har innleiðandi bólkurin hjá Føroyum verður leiktur. Liðið hjá Hjalta Mohr Jacobsen og Djóna Gaard Joensen eru í bólki saman við Burundi, Iran og Svøríki.

Ovastu tvey liðini úr hvørjum bólki koma víðari til meginumfarið, meðan nr. 3 og 4 skulu spæla sonevnda Presidents Cup, sum er um plássini 17-32. Eftir innleiðandi bólkaspælið verður bólkurin hjá Føroyum samantvunnin við bólk G, har Týskland, Argentina, Saudi Arabia og USA kappast, skrivar Hondbóltssamband Føroya.

Vónað og væntað verður at Óli Mittún, Ísak Vedelsbøl, Aleksandar Sasha Lacok í minsta lagi koma víðari úr bólkaspælinum, og síðani eisini kunnu gera seg galdandi.