Nú eru bert tvey stig millum B36 og Víking

Tað var spenningur og nakað av dramatikki í teimum báðum seinastu dystunum í 21. umfari, sum vórðu spældir í kvøld. Teir høvdu eisini sína ávirkan á stríðið um 4. plássið, sum kann geva atgongt til Conference League næsta ár.

B36 var frammanfyri í hesum stríðnum í summarsteðgin men ringa gongdin hjá árstalsfelagnum og stigini hjá Víkingi í august - millum annað tapini hjá B36 á ólavsøku og í innanhýsis dystinum í Sarpugerði - koppaðu skjótt fyrimunin til føroyameistararnar.

B36 er tó komið fýra stig nærri Víkingi seinastu vikuna. Hetta takkað verið tveimum 1-0 sigrum, móti B68 seinast og í Sørvági í dag, og tveimum javnleikum hjá Víkingi móti ávíkavist nummar 6 og 7 í Betrideildini.

Hannes avgjørdi alt í Sørvági

07 Vestur fekk eitt mál kolldømt tíðliga í dystinum, og bæði liðini høvdu risamøguleikar fyri steðgin. 

Leingi sá út til, at botnliðið fór at fáa minst eitt virðismikið stig, men tá tíggju minuttir vóru eftir fann Marius Kryger Lindh væl Hannes Agnarsson. Pláss var í 07 Vestur-verjuni, liðformaðurin rak inneftir í vinstru og setti kaldliga bóltin í netið.

Súrt hjá Micheal Schjønberg og hansara monnum - søtt hjá B36.

Víkingur kroyst og bert við einum stigi heim av Svangaskarði

Eftir nakað av práti og gitingum var Atli Gregersen í byrjanaruppstillingini hjá Víkingi móti B68. Tað var sonur hansara, leigaði Atli Nóa Atlason, tó ikki, og sjálvandi heldur ikki seldi Poul Kallsberg. Kanska sást vantandi breiddin og neyvleikin hjá Víkingi í ár á ymsan hátt.

Sí eisini: Málið um Atla Gregersen: - Hetta er óvirðiligt fyri føroyskan fótbólt

Útiliðið kom annars á odda eftir ógvuliga gott mótálop. Ingi Jonhardsson kom ígjøgnum í vinstru og legði útfrá til Sølva Vatnhamar, ið setti bóltin væl í netið.

B68 var tó væl meira lívligt og vælspælandi enn í hinum dystunum eftir summarsteðgin. Liðið hjá Jákupi á Borg hótti fleiri ferðir, og Bárður á Reynatrøð varð noyddur til at gera nakrar góðar bjargingar.

Inannfyri smáar tríggjar minuttir miðskeiðis í 2. hálvleiki, vendi tað tó frá 0-1 til 2-1 á Toftum. Tað gekk galið í uppspælinum hjá Víkingi, ið annars hevur verið sterkt - serliga í meistarárinum í fjør. Fyrst spældi Arnbjørn Svensson bóltin mitt til ein B68'ara á egnari hálvu og síðani hin miðverjin, Atli Gregersen. Ungu og ágrýtnu Djóni Samuelsen og Hanus Højgaard revsaðu mistøkini við kassa eitt.

Talan gjørdist tó ikki um fyrsta sigurin hjá B68 eftir summarsteðgin men heldur triði janvleikurin á rað hjá Víkingi. Í 90. minutti kom bólturin í hondina á Karstini Clementsen, tá Ingi royndi at fara framvið honum í B68-brotsteignum. Søvi Vatnhamar var aftur ísakaldur og sendi bóltin heilt upp í málhornið.

Ikki ta úrslitið sum Víkingur vildi hava i kvøld, men Sølvi Vatnhamar syrgdi við tveimum góðum skotum fyri javnleiki á Svangaskarði - og at B36 ikki kom nærri enn tvey stig (Savnsmynd: Sverri Egholm)

Betrideildin 21. umfar
Í kvøld, leygardagin 30. august

07 Vestur - B36 0-1 (0-0)
81' Hannes Agnarsson (Marius Kryger Lindh)  

Sí meira um dystin her

B68 - Víkingur 2-2 (0-1)
20' Sølvi Vatnhamar (Ingi Jonhardsson) 0-1
67' Djóni Samuelsen 1-1
69' Hanus Højgaard 2-1
90 (+1)' Sølvi Vatnhamar, br.

Sí meira um dystin her 

Fyrr í dag:

FC Suðuroy - KÍ 2-6 (0-2)

TB - HB 2-7 (2-4)

Sí allar málskjútarnar og les meira her: 17 mál samanlagt: Tvær stórar málveitslur í Suðuroynni

Í gjár, fríggjadagin 29. august
EB/Streymur - NSÍ 1-3 (1-2)
12' Michal Przybylski (Jann Benjaminsen) 0-1
18' Andras Olsen (Mórits Heini Mortensen) 1-1
29' Daniel Obbekjær (Aron Knudsen) 1-2
90 (+1)' Jasper van der Heyden 1-3

Sí eisini: NSÍ heldur fram at leggja trýst á HB

Úrslitini høvdu hesa ávirkanina á stigatalvuna

Dagført: 22.05