Nú skal slagið um Havnina standa

Síðsti dysturin í 4. umfari - umfari nummar tvey - í Betrideildini er eisini tann størsti. Grannauppgerðin í Gundadali burdi verið karmur um undirhald, inntensitet og góðan fótbólt. Í øllum førum í løtum.

HB hevur sitið á hesum uppgerðunum seinastu árini og vunnið sjey út av teimum seinastu ellivur. Hetta vísti bolt.fo á í gjár. B36 hevur ikki vunnið seinastu ellivu grannauppgerðirnar - síðani 7. apríl í 2019 tá B36 vann 2-1 á HB í 4. umfari.

Um hugt verður eftir dómaraseðlanum frá tí dystinum, so eru ikki so nógvir spælarar eftir í teimum báðum hópunum: Teitur Gestsson, Adrian Justinussen, Dan í Soylu hjá HB - umframt Bartal Wardum og Hørður Askham ið nú eru skaddir - Andrias Eriksen, Eli Falkvard Nielsen, Benjamin Heinesen og Andrass Johansen hjá B36. Ivasamt er, hvønn leiklut Andrass spælir í kvøld. Hann hevur verið skaðadarvaður leingi. Eykamálverjin hjá HB fyri fýra árum síðani, Mattias Lamhauge, er nú fyrsti málverji hjá B36 og landsliðsmálverji.


Mattias Heðinsson Lamhauge hevur seinastu tvey árini vart málið hjá B36. Hann er annars uppvaksin í HB (Mynd: Sverri Egholm)

Hjá HB er talan um týðandi dyst, í mun til at staðfesta at munur er á grannunum og fyri at elta KÍ. Síðani 1. umfar hevur nógv neiligt prát verið um mest vinnandi føroyska felagið. Fyrst vann KÍ greitt á HB í venjingardysti á Tórsvølli, og í síðstu viku fór Jákup Martin Joensen, hjálparvenjari úr starvi. Órógv hevur verið í venjaratoyminum í HB, og spurnartekin hava verið sett við høvuðsvenjaran Dalibor Savic, ið tó tykist at hava stuðul í nevnd og spælarahópi. Nú skal tað snúgva seg um spælið.

B36 vann heldur óvæntað 3-0 á Víkingi fyri mánaði síðani. Árstalsfelagið hevur annars havt torført við at vinna dystir móti topp-trý liðum undir Dan Brimsvík, men tað bragdaði í 1. umfari. Nú skal styrkta B36-liðið royna at byggja uppá og stig í kvøld, serliga ein sigur, kundi verið eitt greitt tekin um, at B36 er nærri við oddin í ár. Hannes Agnarsson er aftur frá skaða, og nýggi áleyparin - Valerijs Sabala - hevur fingið loyvini uppá pláss. 

Portalurin verður til staðar til í Gundadali í kvøld. Vit hava myndir, dystarfrásøgn og síðani samrøður aftaná. Á forsíðu okkara ber til at fylgja gongdini. Hetta er í samstarv við dystir.fo 

Betrideildin, 4. umfar (umfar nummar tvey)

Í dag, mánadagin, 3. apríl
18.00: B36 - HB

Í gjár, sunnudagin 2. apríl

ÍF - AB 2-0 (1-0)
11' Hans Jákup Lervig (Pól Jákup Lundsbjerg) 1-0
55' Hans Jákup Lervig (Jhon Mena) 2-0

Myndir: ÍF - AB
Hans Jákup Lervig: - Fantastiskt at skora og at fáa trý stig her í Fuglafirði
Henrik Larsen: - Lata ov løtt mál inn

KÍ  - EB/Streymur 1-0 (1-0)
16' Árni Frederiksberg (Luc Kassi) 1-0

Myndir: KÍ - EB/Streymur

07 Vestur - B68 1-1 (0-1)
1' Ragnar Samuelsen (Mohammed Samba) 0-1
81' Daniel Obbekjær 1-1

Les eisini: 
ÍF stóri sigursharrin pálmasunnudag
Eitt lið hevur fult stigatal fyri tveir dystir

Leygardagin 1. apríl - Sarpugerði
Víkingur - TB 7-0 (1-0)
33' Sølvi Vatnhamar (Ingi Jonhardsson) 1-0
46' Arnbjørn Svensson (Bergur Gregersen) 2-0
50' Martin Klein Joensen 3-0
57' Sølvi Vatnhamar (br.) 4-0
69' Andreas Lava Olsen (Jákup Johansen) 5-0
82' Olaf Bárðarson (Finnur Justinussen) 6-0
90' Finnur Justinussen (Jákup Johansen) 7-0

Myndir: Víkingur - TB
Víkingur vant burturúr TB
Arnbjørn Svensson: - Hava bíðað leingi síðani vónbrotið móti B36
Poul Ingason: - Skulu tora nógv betri at spæla

Støðan í Betrideildini 

1. KÍ 6 stig
2. 07 Vestur 4 stig
3. Víkingur 3 stig
4. HB 3 stig *
5. B36 3 stig *
6. ÍF 3 stig
7. EB/Streymur 3 stig 
8. B68 1 stig
9. AB 0 stig
10. TB 0 stig 

*Ein dyst færri